Në Shqipëri nuk reflektohet ulja e tregjeve botërore

Të dhënat e fundit që ka nxjerr Organizata e Ushqimit dhe Bujqësisë (FAO), tregojnë se çmimet e ushqimeve ranë ndjeshëm në muajin korrik, duke shënuar rënien e katërt radhazi mujore që kur arritën nivelet më të larta rekord në fillim të vitit pas luftës në Ukrainë.

Indeksi i çmimeve të ushqimit sipas Agjensisë së OKB-së, ishte mesatarisht 140.9 pikë në korrik, ose 8.6 pikë më poshtë nga qershori.

Por kjo ulje e çmimeve nuk është reflektuar në Shqipëri. Për produktet bazë të shportës, siç janë vaji, mielli, orizi, apo makaronat,qytetarët ende duhet të paguajnë më shumë se sa para krizës së çmimeve që erdhi si pasojë e luftës që nisi në Ukrainë.

“Me pak blejmë, me çfarë ti blejmë. Po e ndjejmë me shume te bazat, vaji mielli buka kosi qumështi. Një Pazar i thjesht me vete 20 mije lek te vjetra, brenda ditës i harxhoj, ditës tjetër shkoj prapë. Shume keq kanë shkuar çmimet, shume shume keq. Vaji 380 leke, ja hedh gjellës me pikatore. Me pak marrim, ca te bëjmë. Pazari i thjeshte nuk behet fjale, 20 mije lek  nuk merr asnjë gjë, ja qumështi ka shkuar 190 lek”.- tha një qytetar.

Edhe produktet e bulmetit kanë shënuar rritje së fundmi në vendin tonë, duke i ven familjarët e sidomos pensionistët në pozita të vështira, pasi me të ardhurat që kanë nuk mund t’ia dalin.

“Te maresh një kile djathë është 10 mije lek kg, apo te bësh makarona me gjalp, 11-12 mije lek është në stratosferë. Nuk marr dot sasinë qe kërkoj unë por marr me pakice. Për mua bulmeti është rritur ne mënyrë absolute dhe nuk ka perse te rritet aq shume. Dita shkon 5-6 mije lek se dy veta jemi. Ne vend që të merrja 1 kg domate do marr gjysëm kg, me duhen 3 speca, 3 do marr nuk do marr 5”.– tha një qytetar

Në Shqipëri rritja e cmimit të ushqimeve ka qenë dyshifrore. Vetëm në korrik sipas të dhënave më të fundit të INSTAT, ushqimet u shrenjtuan me 13.2% më shumë se korriku i vitit të kaluar. Mes grupit të ushqimeve, rritja më e fortë u vërejt për vajrat dhe yndyrnat me 30.6%.