Elon Musk ka prezantuar së fundmi një plan shumë ambicioz për ndërtimin e një infrastrukture të re prodhimi çipesh, në bashkëpunim mes kompanive të tij Elon Musk, Tesla dhe SpaceX. Sipas një raportimi nga Bloomberg, Musk i ndau këto plane gjatë një eventi të mbajtur në qendër të Austin, duke sugjeruar se objekti i ri, i quajtur “Terafab”, do të ndërtohet pranë selisë së Tesla dhe “Gigafactory”-s ekzistuese në Austin.

Sipas Musk, arsyeja kryesore e këtij projekti është mungesa e çipave në treg, veçanërisht për nevojat gjithnjë e në rritje të inteligjencës artificiale dhe robotikës që përdorin kompanitë e tij. Ai u shpreh se prodhuesit aktualë të gjysmëpërçuesve nuk po arrijnë të furnizojnë mjaftueshëm shpejt, duke e detyruar atë të marrë situatën në dorë. “Ose ndërtojmë Terafab-in, ose nuk sigurojmë dot çipat që na duhen, dhe ne kemi nevojë për çipa,” deklaroi Musk.

Objektivi i këtij projekti është jashtëzakonisht i madh: prodhimi i çipave që do të mbështesin 100 deri në 200 gigavat fuqi përpunuese në vit në Tokë, si dhe rreth një teravat fuqi përpunuese në hapësirë. Megjithatë, Musk nuk ofroi asnjë afat kohor konkret për realizimin e këtyre planeve.

Bloomberg vëren se, ndonëse Musk nuk ka eksperiencë direkte në industrinë e prodhimit të gjysmëpërçuesve, ai njihet për vendosjen e objektivave shumë ambicioze dhe shpesh optimiste në lidhje me afatet kohore. Pavarësisht kësaj, ideja e “Terafab”-it sinjalizon edhe një herë synimin e Musk për të kontrolluar zinxhirin kritik të teknologjisë që qëndron në themel të projekteve të tij më të avancuara.