Apple duket se po përgatitet të integrojë një asistent virtual të bazuar në inteligjencën artificiale në aplikacionin Apple Store, duke synuar ta bëjë procesin e zgjedhjes dhe blerjes së produkteve më të thjeshtë për përdoruesit.

Informacioni u zbulua nga MacRumors, i cili vuri re ndryshime në politikën e privatësisë së aplikacionit. Dokumenti përmend për herë të parë një “Virtual Shopping Assistant”, i cili do të përdorë të dhëna si informacioni i llogarisë, identifikuesit e pajisjes, operatori celular, bisedat me përdoruesin dhe, nëse është aktivizuar, vendndodhjen, për të ofruar përgjigje më të personalizuara gjatë komunikimit.

Apple thekson se përpara se bisedat të ndahen me partnerë për përmirësimin e shërbimit, çdo informacion personal hiqet. Kompania shton gjithashtu se përdoruesit mund të zgjedhin nëse dëshirojnë që bisedat e tyre të përdoren për të trajnuar dhe përmirësuar asistentin, duke e aktivizuar ose çaktivizuar këtë opsion nga seksioni Account > Settings > Chat Improvements në aplikacionin Apple Store.

Megjithëse funksioni ende nuk është aktiv për publikun, prania e tij në dokumentacion tregon se prezantimi mund të jetë i afërt. Asistenti pritet t’i ndihmojë përdoruesit të gjejnë produktin më të përshtatshëm, të krahasojnë pajisje dhe të marrin rekomandime gjatë procesit të blerjes.

Ky nuk është eksperimenti i parë i Apple me chatbot-et AI. Kompania ka nisur më herët testimin e një asistenti të ngjashëm edhe në aplikacionin Apple Support, megjithëse ai ende nuk është i disponueshëm për të gjithë përdoruesit.