Raphinha është rikthyer i rikuperuar plotësisht nga dëmtimi në muskulin e këmbës së djathtë.

Sulmuesi brazilian kishte humbur pjesën më të madhe të sezonit me Barcelonën për shkak të këtij problemi fizik, ndërsa gjatë Kupës së Botës arriti të luante vetëm dy ndeshje, përpara se të pësonte një tjetër dëmtim të të njëjtit muskul.

Megjithatë, tashmë duket se lojtari e ka lënë pas këtë shqetësim. Raphinha u bashkua me ekipin në qendrën stërvitore Saint George’s Park, ku u prit nga shokët e skuadrës me tunelin tradicional të goditjeve miqësore, një ritual i zakonshëm për lojtarët që rikthehen në grup.