Austin FC nuk ia doli dot të triumfojë në këtë edicion të Leagues Cup, turne ku marrin pjesë skuadrat amerikane të MLS dhe ato të kampionatit meksikan.

E megjithatë Myrto Uzuni la një gjurmë të fortë në këtë kompeticion. Sulmuesi i kombëtares shqiptare shënoi 4 gola në këtë turne duke u shpallur edhe shënuesi më i mirë i Leagues Cup së bashku me kolumbianin Daniel Arcila që është pjesë e skuadrës së Leon.

Por jo vetëm kaq, portali i specializuar i statistikave të ndeshjeve, Sofascore, në përfundim të këtij turneu që u fitua nga Toluca, skuadra që eliminoi Austin e Uzunit në çerekfinale, përpiloi formacionin ideal të Leagues Cup. Pjesë e këtij formacioni ishte edhe sulmuesi kuqezi me Myrto Uzunin që ishte vlerësuar me notën 7.98, nota më e lartë e këtij turneu që është i rëndësishëm në futbollin e Amerikës Veriore.