Bankat dhe operatorët që ofrojnë shërbime përmes bankomateve dhe pajisjeve POS do të duhet të jenë më transparentë ndaj klientëve, lidhur me kostot reale të këmbimit të monedhave.

Me ndryshimet e reja rregullatore të përgatitura nga Banka e Shqipërisë, përdoruesit e kartave do të informohen qartë dhe paraprakisht për tarifat e aplikuara, kursin e këmbimit dhe përqindjen shtesë mbi kursin zyrtar, përpara se të kryejnë çdo pagesë apo tërheqje parash.

Sipas Bankës së Shqipërisë, në përputhje me nenin 52, pika 2 të ligjit “Për shërbimet e pagesave”, ofruesit e shërbimeve duhet të shprehin në përqindje diferencën mes kursit të aplikuar dhe kursit zyrtar më të fundit të disponueshëm. Kjo përqindje duhet t’i komunikohet paguesit para inicimit të transaksionit.

Rregullat e reja parashikojnë gjithashtu që klientët të informohen, përpara pagesës ose tërheqjes, për shumën që do të debitohet nga llogaria e tyre dhe për shumën që do të përfitojë marrësi, në monedhën përkatëse. Ky informacion duhet të shfaqet qartë në ekranin e bankomatit ose në pajisjen POS.

“Çdo palë që ofron shërbimin e këmbimit të monedhës duhet të sigurojë paguesit informacion të plotë për shumën që do të paguhet dhe për shumën që do të përfitohet, përpara inicimit të transaksionit”, thekson Banka e Shqipërisë.

Ndryshimet synojnë të adresojnë ankesat e shumta për kostot e larta të këmbimit, veçanërisht në rastet e tërheqjeve cash me karta të huaja, një problem i raportuar shpesh nga turistët dhe emigrantët shqiptarë.

Më herët, edhe Autoriteti i Konkurrencës ka rekomanduar rishikimin e metodologjisë së aplikimit të komisioneve në bankomate, me qëllim rritjen e konkurrencës dhe mbrojtjen e konsumatorit.