Shqipëria zotëron rezerva të konsiderueshme mineralesh strategjike, të cilat sot konsiderohen kritike për industrinë europiane dhe përdoren gjerësisht në teknologji moderne, industri ushtarake dhe prodhimin e dronëve.

Specialisti i gjeologjisë, Panajot Aliçkolli, deklaroi për Inside Story se rezervat e hekur-nikelit në vend arrijnë në rreth 104 milionë tonë, ku 52 milionë tonë janë mineral hekur-nikeli dhe 48 milionë tonë hekur-nikel silikati.

Sipas tij, analizat kimike të kryera ndër vite tregojnë se përmbajtja e hekurit varion nga 35% deri në 44%, ndërsa nikeli mesatarisht arrin rreth 1%. Në mineralin nikel silikat, përqindja e nikelit është edhe më e lartë, duke shkuar deri në 1.3%.

Eksperti shpjegon se dallimet mes dy mineraleve vihen re edhe në pamjen e jashtme. Hekur-nikeli ka ngjyrë kafe të errët, ndërsa nikel silikati paraqitet me një nuancë më të çelur. Ndryshime ka edhe në strukturën gjeologjike dhe fortësinë e tyre, për shkak të përmbajtjes më të lartë të silicës tek nikel silikati.

Aliçkolli thekson se këto minerale kanë rëndësi të veçantë për ekonominë moderne, pasi përdoren në industrinë e avionëve, prodhimin e dronëve, pajisjeve ushtarake, paneleve elektrike dhe baterive me litium.

Megjithatë, sipas tij, Shqipëria aktualisht nuk po përfiton sa duhet nga këto pasuri natyrore, edhe pse Bashkimi Evropian i konsideron këto elemente si lëndë të para kritike për të reduktuar varësinë nga tregjet e tjera globale.

“Nevoja për këto minerale po rritet vazhdimisht, sidomos në një kohë kur industria teknologjike dhe ajo ushtarake janë në zgjerim”, u shpreh gjeologu.