Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, priti në takim një ekip nga Banka Evropiane për Investime.

“Rivellini theksoi në fillim të takimit bashkëpunimin e shkëlqyeshëm që Banka Evropiane për Investime ka me shtetin e Kosovës. Ky bashkëpunim dhe përkrahje faktohet edhe nga shifrat, ku nga viti 2013 janë dhënë në formë asistence mbi 250 milionë euro.

BEI bashkëpunon në disa struktura dhe sektorë si infrastruktura, sistemi i ujërave, sektori privat si dhe do të shtojë fokusin në të ardhmen e afërt më shumë edhe drejt sektorit të energjisë,
me qëllim adresimin e krizës së energjisë dhe dekarbonizimin”, thuhet në njoftim.

Zëvendëskryeministri Bislimi theksoi se prioritetet e Qeverisë, ndër të tjerash, janë edhe në rritjen e financimit sa i përket sektorit të energjisë, sistemit të ujërave, menaxhimit të mbeturinave, ndërmarrësisë, rritjen e investimeve, politikat sociale dhe sundimin e ligjit. Më tej, u diskutua edhe për 3 projekte të mëdha sa i përket dixhitalizimit.

“Palët u pajtuan që do të vijojë bashkëpunimi i afërt e veçanërisht në përshpejtimin e hapjes së zyrës së Bankës Evropiane për Investime në Kosovë si dhe në drejtim të projekteve më të mëdha zhvillimore për Kosovën”, thuhet në njoftim.