Malet E Sharrit, Një Park Kombëtar Nga Më Të Mëdhenjtë Në Europë?

Pas dekadash të shfrytëzuara nga druvarët, një zonë e gjerë, ndërkufitare me bukuri që të lë pa frymë në Ballkan me qendër në Malin Sharr mund të bëhet një park kombëtar, një nga më të mëdhenjtë në Evropë.

Kuvendi i Maqedonisë së Veriut pritet të kalojë së shpejti një projekt-ligj që i jep Malit Sharr atë status. Sipërfaqja prej mbi 240,000 hektarë që shtrihet përmes Shqipërisë, Maqedonisë së Veriut dhe Kosovës është një thesar i bukurisë natyrore dhe jetës së egër të larmishme dhe unike.

Mali Sharr ka 37 liqene akullnajore, 25 prej të cilave në Maqedoninë e Veriut dhe pjesa tjetër në Kosovë, të cilat shkëlqen në shpatet e malit si një mori sysh të gjelbër-gri që skanojnë qiellin.

Veçanërisht mbresëlënëse është biodiversiteti i rajonit, i cili numëron 200 specie bimësh endemike, 167 lloje fluturash, 12 amfibësh, 18 zvarranikësh, 130 zogjsh dhe 45 gjitarë. Kjo është pothuajse gjysma e numrit të përgjithshëm të specieve gjitare në Maqedoninë e Veriut.

Por idili në Brezin e Gjelbër të Ballkanit është rrezikuar për vite me rradhë.

Dekadat e prerjeve ilegale të pyjeve kanë lënë peizazhe të dëmtuara nga erozioni, veçanërisht në shpatet e ulëta të malit Sharr, të cilat vendasit i kanë përdorur për bujqësi falas, gjueti, karburant dhe lëndë drusore.

Gjatë dy dekadave të fundit, Maqedonia e Veriut ka humbur rreth 40,000 hektarë pyll nga prerjet e paligjshme, thonë autoritetet.

Anela Stavrevska-Panajotova, një eksperte e Bashkimit Ndërkombëtar për Ruajtjen e Natyrës, thotë se vendi po dëshmon “një mundësi historike, pas 60 vjetësh, për të pasur një park të ri kombëtar, i cili është pjesa që mungon për zonat e mbrojtura në Ballkan”.

“Së bashku me zonat e tjera të mbrojtura në vendet e tjera fqinje, ne do të kemi zonën më të madhe të mbrojtur ndërkufitare në të gjithë Evropën. Dhe ne jemi shumë krenarë për këtë!” tha ajo.

Që nga viti 1994, autoritetet janë përpjekur të mbrojnë mbi 62,000 hektarë të Malit Sharr në Maqedoninë e Veriut nga shkatërrimet e mëtejshme. Parku do të ndahet në katër zona.