Shkencëtarët kanë lëshuar një paralajmërim për përdoruesit e kufjeve, pasi në disa prej pajisjeve më të njohura janë zbuluar kimikate toksike që mund të shkaktojnë kancer, dëmtime të mëlçisë dhe probleme në zhvillimin e trurit, siç citohet nga The Guardian. Një studim nga projekti ToxFree LIFE for All testoi 81 palë kufje të disponueshme në tregjet e Republikës Çeke, Slovakia, Hungaria, Sllovenia dhe Austria, përfshirë edhe platformat online Shein dhe Temu. Rezultatet treguan se të gjitha kufjet e testuara përmbanin substanca të rrezikshme për shëndetin.

Kimikatet problematike përfshijnë BPA dhe BPS, të njohura si “kimikate të përhershme”, të cilat imitojnë efektet e hormonit estrogjen dhe mund të shkaktojnë pubertet të parakohshëm te vajzat, feminizëm te meshkujt dhe kancer. BPA u gjend në 98% të kufjeve, ndërsa BPS në mbi 75% të mostrave, me përqendrime që arrinin deri në 315 mg/kg, shumë mbi kufirin e sugjeruar nga European Chemicals Agency prej 10 mg/kg. Kimikatet mund të migrojnë nga plastika dhe të absorbohen nga lëkura, veçanërisht gjatë përdorimit të gjatë dhe gjatë aktivitetit fizik, kur prania e djersës përshpejton këtë proces.

Përveç BPA dhe BPS, disa pajisje përmbanin ftalate, toksina riprodhuese, dhe parafine të kloruara që mund të dëmtojnë mëlçinë dhe veshkat, edhe pse kryesisht në sasi të vogla.

Ekspertët, përfshirë Karolina Brabcová dhe Emese Gulyás, kërkojnë masa urgjente nga Bashkimi Evropian për të ndaluar përdorimin e këtyre substancave dhe për të parandaluar zëvendësimin e tyre me kimikate po aq të rrezikshme. Ata theksojnë nevojën për rregulla të harmonizuara që mbrojnë konsumatorët dhe sigurojnë një ekonomi cirkulare të sigurt.

Kufjet e prekura përfshijnë produkte nga markat kryesore si Bose, Panasonic, Samsung, Sony dhe Sennheiser, të cilat janë kontaktuar për komente.