Fitorja e Anthony Joshua ndaj Kristian Prengës vazhdon të jetë në qendër të diskutimeve në botën e boksit, ndërsa ish-pronari i Crystal Palace dhe analisti i njohur i talkSPORT, Simon Jordan, ka ngritur publikisht dyshime për mënyrën se si u zhvillua ndeshja.

Joshua u rrëzua dy herë në raundin e parë nga grushtet e boksierit shqiptar, duke u gjendur pranë një humbjeje befasuese. Megjithatë, në raundin e dytë britaniku u rikthye fuqishëm dhe e mbylli sfidën me nokaut teknik.

Pikërisht ky ndryshim drastik i rrjedhës së meçit ka bërë që Simon Jordan të shprehë dyshimet e tij, duke thënë se skenari i ndeshjes i është dukur i pazakontë. Sipas raportimeve, ai ngriti një teori konspirative, duke pyetur nëse kishte diçka që publiku nuk po e shihte, pasi Prenga dominoi fillimisht, por më pas ritmi i tij ra ndjeshëm.

Megjithatë, Jordan nuk paraqiti asnjë provë për pretendimet e tij, ndërsa deri më tani nuk ekziston asnjë evidencë që sugjeron se përballja ka qenë e manipuluar apo e kurdisur. Edhe mediat britanike që raportuan deklaratat e tij theksojnë se bëhet fjalë vetëm për dyshime personale dhe jo për fakte të konfirmuara.

Pavarësisht debatit të ndezur, fitorja e Joshua-s mbetet zyrtare dhe i hap rrugën superduelit të shumëpritur me Tyson Fury, ndërsa performanca e Kristian Prengës, sidomos në raundin e parë, ka marrë vlerësime të shumta nga tifozët dhe ekspertët e boksit. /PriveBruto